Էսկիմո տորթ

Նախ պատրաստենք առաջին շերտը։ Դրա համար հարկավոր է մեծ թասի մեջ կոտրել 4 ձու, լավ հարել 1 բաժակ շաքարավազի հետ, ավելացնել 2 բաժակ թթվասեր, որից մեկ բաժակը կարելի է փոխարինել մածունով, ես հենց այդպես էլ պատրաստում եմ։

Զանգվածը համասեռ դարձնելուց հետո ավելացնում ենք նաև կես սուրճի բաժակ ձեթի ու 3 լիքը ճաշի գդալ կակաոյի խառնուրդը։ Կակաոն ցանկացած խմորի ու կրեմի մեջ ավելացնելիս նախընտրելի է ավելացնել ձեթի կամ հալած կարագի հետ խառնած։

Այդ տարբերակով առավել արտահայտիչ է դառնում կակաոյի գույնն ու շոկոլադային համը։ Վերցնում ենք ևս 3 ձու, դեղնուցները առանձնացնում ենք, պահում եփվող կրեմի համար, իսկ 3 սպիտակուցը կես բաժակ շաքարավազի հետ պինդ բեզե ենք պատրաստում։

Երբ բեզեն արդեն լավ պինդ հարված է, գդալ-գդալ ավելացնում ենք նախապես պատրաստված խմորի զանգվածին ու զգուշորեն խառնում։ Երբ ստանանք համասեռ զանգված, ժամանակն է ավելացնելու ալյուրը։ 2 լավ լիքը բաժակ ալյուր ենք ավելացնում’ մաղելով ուղիղ թասի մեջ։

Սոդան չենք մոռանում, ինչպես միշտ, ավելացնում ենք ալյուրի հետ խառնած, ոչ մի դեպքում մածունի հետ չենք խառնում։ 

Պետք է ստացվի թթվասերից քիչ ավելի խիտ խմոր։ Այս խմորը ես թխել եմ ջեռոցի ստանդարտ տապակով, նախապես 200 աստիճան տաքացված ջեռոցում։ Տապակի մեջ նախապես հարկավոր է յուղաթուղթ դնել ու ձեթ քսել։ Խմորի պատրաստ լինելը ստուգում ենք չոփիկով։ Թխված շերտը դուրս ենք բերում տապակից, տեղավորում սրբիչի վրա մինչ սառչելը։

Մեր խմորը թող իր համար հանգիստ սառչի, իսկ մենք անցնենք մեր այսօրվա տորթի ամենակարևոր հատվածին։

Պատրաստում ենք էսկիմոյի կրեմը։ Նախ սառնարանից դուրս ենք բերում 350 գ կարագը, կտրատում ենք ու թողնում, որ դառնա սենյակային ջերմաստիճանի։ Հարկավոր է այժմ պատրաստել եփվող կրեմը։ Մի փոքր թասի մեջ խառնում ենք 3-4 դեղնուցը, մի բաժակ շաքարավազն ու 3 լիքը ճաշի գդալ օսլան։

Մի քանի գդալ կաթ ենք ավելացնում, որ կարողանանք զանգվածը լավ խառնել, դեղնուցը հավասար տարածվի։ Այս զանգվածի վրա բարակ շիթով ավելացնում ենք 500-600 գ եռման, շատ տաք կաթը ու անդադար հարում։ Ավելացնելուց հետո արագ դնում ենք կրակին, եփում մինչ պնդանալը։

Կրեմը օսլայով պատրաստելիս պետք է հաշվի առնել կարևոր մի հանգամանք. օսլան դեղնուցից շուտ է ջերմային ազդեցության ենթարկվում, շատ շուտ է պնդանում։ Քանի որ դեղնուցը բարձր ջերմաստիճանում է անվտանգ դառնում, եփվում, դրա համար երբ կրեմը սկսում է մի քիչ պնդանալ, կրակից վերցնում ենք, թողնում եփը կանգնի, որ օսլայի խտանալու գործընթացը դանդաղեցնենք։

Կրակին վերադարձնելուց հետո եփում ենք մինչ խիտ շիլայի խտության հասնի։ Պատրաստի եփովի կրեմը թողնել, որ հասնի սենյակային ջերմաստիճանի, որից հետո նախապես մի 5 րոպե հարած, արդեն սպիտակած կարագի վրա ենք ավելացնում գդալ-գդալ ու հարում միջին արագությամբ։ Քանի որ այս տորթի դեպքում կրեմը գլխավոր դերում է, ուստի աշխատում ենք, որ ստացվի գերազանց որակի։ Դրա համար աշխատում ենք հարել միջին արագությամբ, արագ հարելու դեպքում կրեմի կտրվելու հավանականությունը մեծանում է։

Պատրաստի կրեմը հաստ շերտով քսում ենք նախապես թխված բիսկվիթային շերտի վրա, հարթեցնում ենք ու դնում սառնարանը, որ կրեմը լավ ամրանա։ Կրեմը լավ սառելուղ հետո արդեն կարելի է հալեղված շոկոլադով կամ գլազուրով ծածկել։

Գլազուրի իմ տարբերակին ծանոթացեք փայլուն ջնարակ հրապարակման մեջ։ Տորթը գեղեցիկ կտրելու համար նախապես պետք է դնել այն սառնարանը, կամ գոնե մի 20 րոպե պահել սառցարանում։

Խորհուրդ եմ տալիս ամեն մի կտրվածքն անելիս դանակը լվանալ ու սրբել, որ ստացվեն կոկիկ ու գեղեցիկ կտորներ։